انسان أيا إنسان ما أجهلك
ما أتفهك في الكون و ما أضألك
شمس وقمر و سدوم و ملايين نجوم
و فاكرها يا موهوم مخلوقه لك
عجبي !!
حاسب من الاحزان و حاسب لها
حاسب علي رقابيك من حبلها
راح تنتهي و لابد راح تنتهي
مش انتهت أحزان من قبلها؟
عجبي !!!
خرج ابن آدم من العدم قلت: ياه
رجع ابن آدم للعدم قلت: ياه
تراب بيحيا.. وحي بيصير تراب
الأصل هو الموت والا الحياه ؟
عجبي !!!
ضريح رخام فيه السعيد اندفن
وحفره فيها الشريد من غير كفن
مريت عليهم .. قلت يا للعجب
لاتنين ريحتهم لها نفس العفن
عجبي !!!
أحب أعيش ولو في الغابات
أصحي كما ولدتني أمي وابات
طائر.. حيوان.. حشرة.. بشر ..بس أعيش
محلا الحياة حتي في هيئة نبات
عجبي !!
ليه يا حبيبتي ما بيننا دايما سفر
دا البعد زنب كبير لا يغتفر
ليه يا حبيبتي ما بيننا دايما بحور
اعدي بحر الاقي غيرة اتحفر
وعجبي!!
0 التعليقات:
إرسال تعليق